பிரிய தெய்வங்கள்

நிறைவான புணர்சிக்குப்பின்
நிகழும் ஆழ்ந்த உறக்கத்திற்கான
வேட்கையோடு
மதுரசம் நிறைந்த சிறு குவளையின்
பேராழத்திற்குள் மூழ்குகிறேன்
என் பிரிய தெய்வங்களில் ஒருத்தி
தன் நிர்வாணத்தை பரிசளிக்கிறாள்
என் சயன அறையெங்கும்
நறுமணம் கமழ அவள் தன் பருவங்களை
மலர்த்துகையில்
அமிர்தம் கசியும் மதுரசதோடு
எல்லா சன்னல்களையும்
திறந்து கொண்டு
பெய்கிறது மழை
ஆகாயத்திற்கும் எனக்குமான
தூரம் மிகுதியானது என்றாலும்
பார்வைக்கு அண்மை கொள்கிறது நிலவு

யுகாயினி

எழுந்து வா என் யுகாயினி

சர்பரூபமாகி எனைத் தீண்டு

கனியுண்ட கானகம் வா

குறி பொருந்த என்னில் அமர்

புனல் பெருக நின்றெழு

உன் யோனி வணங்கிப்

பணிதல் வேண்டும் நான்